നവംബര് 30, 2014
സ്ഥലം : പൂലാനി കോവിലകം പടി ബസ് സ്റ്റോപ്പ് പരിസരം.
സമയം : വൈകീട്ട് ഏതാണ്ട് ഒരു അഞ്ചര മണി.
സമയം : വൈകീട്ട് ഏതാണ്ട് ഒരു അഞ്ചര മണി.
റോഡിലൂടെ ഏതാനും ചെറുപ്പക്കാര് ചെറു സംഘങ്ങളായി അങ്ങോട്ടും ഇങ്ങോട്ടും നടന്നകലുന്നു. കുശലം പറഞ്ഞും പൊട്ടിച്ചിരിച്ചും അങ്ങനെ അങ്ങനെ. ഹിന്ദിയിലാണ് ആശയ വിനിമയം. ഏതോ ഒരു ഉത്തരേന്ത്യന് തെരുവില് നില്ക്കുന്ന പ്രതീതി. അല്പം കഴിഞ്ഞപ്പോള് ഒരാള് ഒറ്റയ്ക്ക് വരുന്നു. എന്റെ അടുത്തെത്തിയപ്പോള് ഒരു ചോദ്യം. ഹിന്ദിയിലാണ്. പെട്ടെന്നുള്ള മറുപടി നാക്കില് നിന്നും മലയാളം ചാനലിലൂടെയാണ് തെറിച്ചു വീണത്. സ്ഥലകാല ബോധം വീണ്ടെടുത്തു. ഹിന്ദി ചാനലുകള് ഒന്നും സബ്സ്ക്രയിബ് ചെയ്തിട്ടില്ല. പൂലാനി സ്കൂളില് ഹിന്ദി പഠിപ്പിച്ച ആര്യാദേവി ടീച്ചറെയും ഈസ്റ്റു ഹൈസ്കൂളിലെ കല്യാണിടീച്ചറെയും മനമുരുകി വിളിച്ചു. ആരും കനിഞ്ഞില്ല. അതുകൊണ്ട്, ഉദ്ദേശിച്ചത് രസനയില് കിനിഞ്ഞുമില്ല. സ്കൂള് ആനിവേഴ്സറിക്ക് ഹിന്ദി പ്രസംഗത്തില് ഒന്നാം സമ്മാനം കിട്ടിയതൊക്കെ വെറും ഏട്ടിലെ പശു. ഇവനേതു കോത്താഴത്തുകാരന് എന്നമട്ടില് ചോദ്യ കര്ത്താ വ് നടന്നകലാന് തുടങ്ങുമ്പോള് മുജ്ജന്മ സുകൃതമെന്നോണം വാഗ്ദേവി നാക്കിലൂടെ അഷ്ടാക്ഷരിയായി കയറിയിറങ്ങി.
"മുഝേ ഹിന്ദി മാലും നഹി'.
തൃപ്തനായോ എന്തോ, കക്ഷി നടന്നകന്നു, ഒട്ടേറെ മറു ചോദ്യങ്ങള് എനിയ്ക്കായി കുടഞ്ഞിട്ട്.
ഞാന് ജനിച്ചു വളര്ന്ന ഈ മലയാള ഗ്രാമത്തില് നിന്നു പിഴയ്ക്കാന് മലയാളം പോരെന്നു വരുമോ?
വീടിന്റെ മുറ്റത്തു നിന്ന് എന്റെ അച്ഛനെ വിളിച്ചാല് 'ബഹുത് അച്ഛാ' എന്നാരെങ്കിലും ഏറ്റുപറയുമോ?
എണ്പതുകളില് മലയാളക്കരയെ പുളകം കൊള്ളിച്ച സമ്പൂര്ണ സാക്ഷരതായജ്ഞത്തിനു പുതിയ പതിപ്പിറങ്ങുമോ? സമ്പൂര്ണ ഹിന്ദി സാക്ഷരത?
മുഝേ മാലും നഹി സാബ് , മാലും നഹി
No comments:
Post a Comment